شعر لمصر الحبيبه

يا مصر يا حافظة قرآنك وأناجيلك
ولو تناديني من الغربة أنا أجيلك
وفي وقت الشدة أدعي لك وأناجي لك
و مهما تموت هنا أجيال ... أنا جيلك

مكتوب لي أغنيلك و أغزل مواويلك
و إن جف نبع الحب يرويه عسل نيلك

عشقك في مهدي ابتدا و أنا دمعي قطرة ندى
علمني أول ندا يا غالية أدعي لك

ياللي الدهب شعرك مفرود على ضهرك
لو امتلك مهرك حيقيدلي قنديلك

يا صابحة متعطرة من حلفا للقنطرة
أنا اللي دمعي اشترى أغلى مناديلك